Kampioene blink uit in Gobabis se beesring
Die beesring by die Gobabis Landbou Skou was ’n miernes van bedrywighede, met telers wat ’n verskeidenheid rasse en stoeterye in die kollig gebring het.
Van Simmentaler en Simbra tot Brahmane, Charolais, Braunvieh en Santa Gertrudis was daar ’n wye verskeidenheid beeste om te bewonder.
Die beesafdeling het verskeie gevestigde stoeterye byeen gebring, met telers wat die geleentheid gekry het om hul diere ten toon te stel, terwyl besoekers die verskillende rasse van nader kon besigtig.
Onder die Simmentaler-uitstallers was Bertus en Dewald Walters van Walsim Simmentalers, asook die Krafft-familie van Ibenstein Simmentalers.
Die Simbra-afdeling het Bonnie Nieuwoudt van Bonbennic Simbras, die Heimstadt-familie van Exito Simbras, Vaja Mbapaha van Otjiporo Simbras en Stefan Beukes van AreV Simbras ingesluit.
In die Santa Gertrudis-afdeling het Mbakumua Hengari van Ozendjeno Santas die ras verteenwoordig.
Die Charolais-afdeling het Bertus Calitz van Jonérus Charolais ingesluit, terwyl Junior Versfeld van Die Rante Braunvieh in die Braunvieh-afdeling meegeding het.
Goeie Brahmane-verteenwoordiging
Die Brahmane-afdeling het ’n sterk groep telers gelok, onder wie Christo du Plessis van Moria Brahmane, Festus Katjirua van Ondanga Brahmane, Ambrosius Kavaka van Ambromanso Brahmane en Ace Kavari van Komboro Brahmane.
Ook in die afdeling was Herryson Korupanda van Kalahari Brahmane, Edison Katjipuka van Katjipuka Brahmane, Kakunanganda Korupanda van Okanene Brahmane, Venotjari Mbaisa van Wolle Brahmane, Pieter Nel van Nel Brahmane en Collin Venaani van Shamrock Brahmane.
Die verskeidenheid telers en stoeterye het die wye reeks beesrasse by vanjaar se skou weerspieël.
Interraskompetisie sorg vir spanning
Die beeskompetisie het voortgegaan met die interrasklasse, waarin diere uit die verskillende rasafdelings teen mekaar meegeding het.
B. Calitz het die Interras-vers-titel met die Charolais-vers Janerus 2529 JAC verower, terwyl B. Nieuwoudt die Interras-bulkalftitel met die Simbra Bonbennic 265 BON ingepalm het.
Die junior klasse het ook sterk kompetisie gelewer. M. Hengari het die Junior Interras-bultitel met die Santa Gertrudis Ozendjeno 2512 FH gewen.
B. Nieuwoudt het nog ’n junior interrastitel vir die Simbra-ras ingepalm met Bonbennic 244 BON, wat as Junior Interras Koei/Vers aangewys is.
In die senior interras-klasse het C. du Plessis die Interras-koeititel met die Brahman Moria 23202 CDP verower. B. Calitz was weer onder die wenners en het die Interras-bultitel met die Charolais Janerus 2302 JAC gewen.
Die kompetisie het sy hoogtepunt bereik met die Kampioen van Kampioene-titel, wat aan B. Calitz met Janerus 2302 JAC toegeken is.
Die interrasuitslae het ’n verdere mededingende element tot die beesafdeling gevoeg, nadat telers en diere reeds in die individuele rasafdelings meegeding het.
